Psalms 107

Leemi Asu Ri Ne Moroa Mumu Labalamu Ren

1Nedik ata tong avukat ti ne Moroa mila neni axa i lok nunuan; labalamu ren naba tu lexen! 2Nemi axap ua neni ga lox asepsu nimi, mina tong amisik na levelinga ti emi asu mi Leeme Silok i lok keretna, “Labalamu ren naba tu lexen!” Neni ga lox asu ka nimi basinge lavamunepen atnimi, 3la gara lam amlong nimi ude boro at levenep silok petpes, at lenep meso la mesi la boro bok at lenep mero la mexun. 4Lentaba diga soronga ro at lamatbin aaxa la di goxo epovo xusu dina vuse ka tangas tidi uto at temenemen silok kusu diba nemen e. 5Nedi digak toxo la digak minu, la diga doma i do, di mo dina seeve nga. 6Melemu diga reng ti at Leeme Silok mumu lumumuat atdi, la neni ga lox asu di basinge lixitkis etaba. 7La neni ga lam nedi at langas manmanton uto at lemenemen silok, la diga nemen e. 8Kuren la ik mokso do dina tong avukat ti Leeme Silok mumu mo labalamu lexen teren, la ri lempanga nunuan neni gara lok pam i ridi; 9atla Leeme Silok im taba dan limixin dik minu, la im taba nedi dik toxo mi lempanga anan avukat.

10Lentaba digang songot keneng at lamain bonot ngan luvuttadi xokoxo, mo diga xoxo nedi mi levenoos sen. 11Digak lok go mila diga ronga viribang at levelinga ren, ne Moroa, ni Lanaraavuk. La diga sok tixirixes xepe levenanasa ren. 12Diga baava rinotno mi laxan gugu solo, la digak sak saaban, la goxopmen tara go ri lok tooro di. 13La melemu diga ro ke at Leeme Silok at levenaleng at levenmumuat la neni ga lox asepmus di basinge mo labaava. 14Neni ga lam asu nedi basinge lamain la loxokoxo, la ga ba koxorop pes levenoos sen basinge di. 15Kuren la i epovo do dina tong avukat ti Leeme Silok mumu mo langsangan labalamu ren, la lempanga nunuan neni gara lok pam i ridi. 16Mila neni i tit dadas asi laramusaragu dik lox i mi loborons, la i tit amdamda lengkompanga soksoxoba matmatkun dik lox i mi la aen.

17Lentaba diga lok ngan ta luvuttadi baulang, la diga xip levesongsongot mumu leveloklok kakapmek la leventaangas kapmek atdi. 18Digak bulunga levempanga anan, la ma lixilik diga lok do dina met. 19Melemu diga reng ti Leeme Silok mumu levenmumuat digap kiv i, la neni ga lox asepmus di basinge mo levenaknixip. 20Neni ga tong asu levelinga ren ti lok pes leven anmeres atdi, la neni ga lox asepsu di basinge lanmet. 21I epovo do nedi dina tong avukat ti Leeme Silok, mumu mo langsangan labalamu ren, la mo lempanga nunuan neni ga lox pam i ridi. 22I epovo do dina tong avukat ti Leeme Silok la dina raba i mi leventamtaba eburu mi livikpixan ti emi asu, kusu ri tong asu mo lempanga neni ga lok pam i.

23Lentaba diga sen tangtagap mi lempattaaxup to at laras axa, kusu dina ruuna kaka lempilas at mo lugugu atdi rovana at lempattaaxup. 24Diga ven lempanga sangsangu Leeme Silok ga lox i mi mo lolos teren to at laras. Mo lempanga ga nunuan aleng. 25Neni ga vaase, la ga lok kaxat mo langsangan lamanman silok, mo ga lox axatu kaxat lempopaxanao. 26Lempopaxanao ga xip kaxat mo lempattaaxup upana xasep la ukopok la mumu mo laniu di goxo doma abelemes bok ba do diba roo. 27Diga saaban onon la digat pas tangtangku ngan diga inin lengkadan lolos, la di goxok len i do diba lok lavanga salai. 28Melemu diga ro ke at Leeme Silok mumu mo levenmumuat atdi, la neni ga lox asu nedi basinge mo laniu. 29Neni ga lox amila lamanman bet la garak lox atnaasan ta, la lempotas at laras bok digak midi mila. 30Diga momo aleng at lavanga ga mila, la neni ga mu asu lavavara atdi diga oso avukat to at losoolom. 31I epovo do dina emi asu mi Leeme Silok, mumu labalamu lexen teren la lempanga nunuan neni ga lok pam i ridi. 32I epovo do dina tong asu lolos teren keneng at lempotpot buru at limixin, la dina emi asu min kantubu at lovotpot buru at luvuttadi amgomgo.

33Leeme Silok ga vuk gili leven menemen dan ga ngan ta lamatbin patmang, la lengkondan i puuvut su, neni ga lox amesemes i, 34la laxangka liliun neni ga lox i ga ngan ta lomon tep; neni ga lok na lempanga mumu laxapmek atnedi diga nemen go ap mo leven menemen dan.

35Melemu neni ga ba gili amlong mo lamatbin patmang, ga ngan manga lengkodan i puuvut su, la neni ga lox asen amu laradan sen go at lenep kangka vatmang. 36Neni ga siam avolo limixin digak pakes ti lempanga anan kusu dina nemen go, la diga xip lemenemen silok tidi ri nemen e. 37Digat lotlo leventaamang la laxanoos vaen, la digap sepkin aleng. 38Neni ga lox anarong di, la diga vosok aleng, la neni goxo ke xepe ba levesipsip mi levenbulumaxao atdi gita mun pipisik.

39Melemu lavamunepen diga sak tup mi limixin at ne Moroa, la diga raba nedi mi leven aknixip la levesongsongot silok. 40Ketla ne Moroa ga lox asongot nedi limixin munepen, ni ga riki di uto at lamatbin aaxa kusu dina soronga go. 41Ketla neni ga lam aase limixin pakpakes teren, basinge levenmumuat atdi; la ga lox anarong di kusu dina vosok aleng ngan laxasipsip. 42Do limixin mokmokso dina ven i na, dina momo, ketla nedi limixin kapmek dinaba vamus levenngusno atdi. 43Do nege lodoxoma ren i xasep nunuan, ni na doma mumu i na lempanga, la na doma mumu avukat bok labalamu lexen at Leeme Silok.